طبعا كلنا متابعين القرار الجوهرى اللى حصل علي موقع upwork بخصوص تغيير التعامل
مع عمولة المشاريع بشكل مفاجيء ...
انا هنا هطرح وجهة نظر مختلفة شوية .. تحاول تبص على النقط المفيدة
و ازاي نعرف نتعاملمع " الواقع " ده كما هو .. دون اي امل فى تغييره ..
لأن ببساطة :
1- آلية القرار فى شركات زي اب ورك :
خلونا نفهم ان الشركات دي بكل أسف مش بتطلع قرار من دماغ مدير .. و انما بتدرس المكاسب و الخسائر و ردود الافعال
و حتى احتمالية كام واحد او نسبة قد ايه هيسيبوا الموقع او تفاعلهم هيقل و سماتهم ايه الكام واحد دول كمان .. سواء زباين او فرى لانسر .. و شريحة اموالهم و البلد الديمغرافية .. و ردود افعال المنافسين .. بشكل واسع المدي جدا جدا و شاملة نقاط كتير ..و بيشوفوا فى المجمل توقعات بعد سنة , هل الموقع هيستفاد و لا لأ .. و يطلع كسبان و لا مش هيطلع ؟
و بعدها تصويت .. على كل مستوى اداري .. و تقدير موقف .. ثم نقاشات .. لغاية ما يوصلوا لقرار اصداره و اعلانه و كيفية ده و هيتم ازاي تسويقه
.
1- حتى لو غلط .. تراجعهم هيخسرهم اكتر :
حتى لو الشركة طلعت قرار و كان غلط , فطبقا لقواعد ادارة الشركات , صعب اوي يتم الرجوع فيه فى وقت قصير
.. عشان :
* ما تديش انطباع ان الشركة متذبذبة
لأن ده بيأثر على ثقل الشركة فى البورصة و الاقتصاد و المساهمين .. اللي بيحسوا ان ادارة الشركة عبيطة .. تطلع قرار و تلغيه بعد اسبوع او شهر .. حاجة زي كدة بتخسر الشركة اكتر بكتير
* ما تديش انطباع للفرى لانسر انهم يقدروا يعترضوا على اي حاجة مش عاجباهم بنفس الطريقة
لو حصل ده هتسمح بتحول الفرى لانسر من مستخدمين الى لوبي ضغط و لنفس السبب برضه عشان ما تديش احساس ان دعوات زي مقاطعة او هجوم بتأثر فى الشركة فده تلقائيا بيخلي الدعوات دي تنعدم مستقبلا.
يبقى منطقيا ..
القرار ده ( على الارجح ) هيطول معانا بكل أسف ..
شئنا أم ابينا .. شخصيا .. نفسي يتلغي .. لكن منطقيا همشي مع التوقع المتشائم انه مش هيتلغي
.. طب و بعدين هنتعامل ازاي ؟
اول حاجة لازم نفهم القرار ده حيثياته ايه بالضبط :
1 - القرار بيتكلم عن زيادة رسوم من الشهر القادم
2 - الزيادة هتكون للشغل الاقل من 500 دولار اجمالا او على دفعات
3 - الزيادة هتكون بقدر 20% مرة واحدة ..
ده خلاصة القرار , الباقي تفاصيل عادية ..
( زي مثلا :
معناه ايه الكلام ده ؟
ببساطة ..
* لو انت اشتغلت مع عميل بمبلغ 100 دولار .. اب ورك هيخصم 20دولار
ثم لو اشتغلت تاني مع عميل تاني .. بمبلغ 100 دولار .. اب ورك هيخصم 20دولار
طيب لو قعدت تشتغل مع 20 عميل ؟ كل واحد 100 دولار ؟
يعني اجمالا = 2000 دولار ؟
اب ورك هياخد منك قد ايه ؟ 400 دولار !!!
طب و بعدين ؟
تعالى بقى للحالة التانية :
* لو قررت بدل ما تشتغل مع عميل و عميل و عميل .. لغاية ما توصل لـ 20 عميل ..
انك تشتغل مع عميل واحد فقط ..
بمشروع 100 دولار .. ثم مشروع 200 ثم مشروع 200 .. او ازيد شوية
يبقى كدة هتكون اشتغلت معاه ما يساوي 500 دولار ..
و يبقى كدة هتخش فى شريحة ( ما بعد 500 دولار ) اللى هيا بعيدة عن الزيادة دي
الله ؟
طب لو اشتغلت معاه لغاية 2000 دولار برضه ؟
اب ورك هتاخد 200 دولار تقريبا .. يعني النصف تقريبا
( بنقول تقريبا لأن اب ورك عشان عارفة بعد تطبيق القرار هيكون فى محاولة سريعة لتجاوزه من ناس كتير عشان ياخدوا النسبة القديمة مش الجديدة العالية .. فعملت ايه ؟ :
خلت انك لو اشتغلت مع عميل واحد اكتر من 500 جنية سواء فى عقد واحد او اكتر هتخصم منك برضوا 20% على اول 500 واللى يزيد عن 500 هتخصم عليه 10% .. يعني هيا بتتعامل مش مع مجرد تجاوز رقمي و خلاص .. لا لازم يكون تجاوز حقيقي عشان تبتدي ترجعك للنسبة الخصم 10% .. حبينا نوضح هنا تفصيليا منعا للتفكير ده )
طب و ليه اب ورك بيعمل كدة ؟
ايه فكرته يعني ؟ ببساطة :
هو عاوزك بدل ما كل عامل فرى لانسر .. حاجز مشاريع عند 20 عميل ..
انه يركز مع عميل او تلاتة بالكتير ..
ده هيفيد اب ورك فى كذا حاجة .. ايه هما ؟
1 - اول حاجة : تقليل الفرى لانسر السريع الطيارىظاهرة الفرى لانسر بتاع الشغل الطيارى .. هتختفي ..:
اللى هو فرى لانسر يعمله شغلانة صغيرة من ابو 20 او 30 .. و يجرى ..
او يعملها سلق كدة و مش بيهمه العميل .. لأنه بيرميه و يخش ع العميل اللى بعده .. و بيعمل شغل اي كلام و مش هامه الفيدباك و بيلم فلوس طيارى و بس ..
ده قرار زي ده هيدمره تماما
.
2 - تاني حاجة : تقليل الاخطبوط.ظاهرة الفرى لانسر الاخطبوط .. هتختفي :
اللى هو فرى لانسر اللى بيحجز 30 عميل فى 60 مشروع و بيشتغل معاهم متوازيين فى نفس الوقت .. و بيسد فرص لغيره من الناس انهم يلاقوا فرى لانسر تاني بديل
و ممكن ييجي فى نص السكة و يقفل مشروعين تلاتة منهم عشان مش لاقي وقت
لأنه محمل نفسه فوق طاقتها اصلا
( اكتر ناس مشهورين بيها : الفلبيين )
.
3 - تالت حاجة : الهنودالهنود و البنجلاديش الرخاص
الفرى لانسر اللى بيسعي للمبالغ الصغيرة جدا او بينافس بعرض مبالغ صغيرة ..
و دول اكترهم الهنود اللى بينافسوا بعرض اجور رخيصة ..
دول كدة اتضربوا فى مقتل .. لأنهم لو عرضوا اسعار قليلة .. يبقى كدة ايه ؟
فكر كدة ؟ بالضبط .. هياخدوا وقت طويل اوي عشان يوصلوا لشريحة 500 دولار مع اي عميل او حتى عدد من العملاء مجتمعين !!!
.
و فى ذات الوقت ..
4 - رابع حاجة : دعم اكتر للقدام
دعم القدام اللى زعلانين من بعد قرار job success و انهم حاسين باهمال ..
لأن بعد القرار ده .. اكيد كل زبون و كل فرى لانسر قديم هيدور على زبون او اتنين و يركزوا معاهم
و الساحة هتفضي اكتر و اكتر ليهم ..
و اجمالا .. لما الواغش هيقل .. ده مصلحة على المدى البعيد لكل واحد قديم اجمالا رغم الضرر فى المدي القصير
طيب
التعامل يكون ازاي فى ضوء ده كله ؟
ما أنصح بيه .. و ده محض اجتهاد مني .. اننا نحاول نعمل التالي
1 - ركز تكسب الزبون مش الفلوس ( زي ما قلت فى المحاضرة لو تفتكروا )
2 - ركز ان الزبون يطلع راضي تماما و تتفق معاه على شغلانة تانية
3 - اصطاد السمك الكبير و طنش السمك الصغير
4 - دور فى دفاترك القديمة عن الزباين و ابعتلهم عروض حلوة باسعار حلوة او باكيدج تصميمات حلوة .. هما واثقين فيك و جربوك .. فكرهم بيك
5 - دور على الزباين اللى عملت معاهم مجمل مشاريع اكتر من 200 دولار
و ابعتلهم عروض خاصة بتخفيضات 25% و 50 %
طيب لو جديد على مجال الفرى لانسر ؟
1 - لو جديد الحق بسرعة و ابتدي .. لأن مع كل قرار الموضوع هيكون اصعب عليك .. كل يوم بتبدأ فيه بدري .. بتكسب .. القرارات تقلق برضه
2 - لو جديد برضه اطمن .. القرار ده هيخفف من الهنود و البنجلاديش .. لهذا ركز على تميزك فى مجالك و ما تقلقش
3 - اكتساب الزبون و رضاه اهم من جمع الفلوس .. ركز على التميز و الابهار و النجاح و الاتقان تكسب
أخير .. نأمل الخير .. لكن نتعامل مع الواقع الصعب و نحاول نكيف نفسنا عليه الى ان يحدث و يجد جديد :)
بالتوفيق دايما :)
محمد علم
