لازم تعرف ان فى الفرى لانسر باب رزق عظيم جدا جدا لكل واحد درس محاسبة او تجارة .. و ده لعدة اسباب
أولا : أسعار المحاسبين الأجانب
برة سعر المحاسب التجاري ( اللى بيعمل حسابات المشاريع )
.. عالي جدا جدا بيوصل على الأقل ل 11 دولار فى الساعة !
ده البداية بس , و ده سعر صعب اوي على المشاريع الصغيرة و المتوسطة
يعني مثلا صاحب مطعم همبرجر صغير عجوز فى كاليفورنيا ..
هيجيب منين محاسب يدفعله 100 دولار فى يوم .. ؟
بينما ممكن يكون دخل المطعم نفسه 200 دولار فى اليوم ..
فالموضوع مكلف .. حتى فى امريكا او اوروبا
ثانيا : الخوف من الأخطاء
الضرايب فى اوروبا و امريكا مفيهاش هزار لو تكرر الغلط .. خطأ واحد فى الحسابات ممكن يوصل لغرامة صعبة او لإنذار قوي او حبس او قفل المشروع ..
لهذا اصحاب كل مشروع فى امريكا بيراجعوا الحسابات مرة و اتنين و عشرة
و ده يستلزم انه ما ينفعش يعتمد على محاسب واحد فقط او مكتب واحد فقط
بل يفضل جدا جدا .. يستعين بخدمة أكتر من محاسب
و هنا برضه تكلفة الخدمة بتزيد ( راجع السبب الأول )
ثالثا : صعوبة الوصول
مكاتب المحاسبة مش متوفرة فى كل حتة .. الولايات المتحدة و كندا مثلا فيها مناطق بعيدة .. مساحة كندا هي قد مساحة الوطن العربي .. و عدد سكانها اقل من مصر
يعني انا كصاحب مطعم لو عاوز ادور على محاسب جغرافيا .. هلاقي اختيارات قليلة و مش كتيرة زي ما انتا متخيل
لهذا اغلب خدمات المحاسبة فى امريكا و اوروبا و كندا هي اونلاين
بس سعرها ( راجع السبب الأول )
فهنا اصحاب المشاريع الصغيرة .. صاحب مطعم الهمبرجر اياه بيدخل اونلاين
و بيتواصل مع محاسبين امريكان
بس اذا كان كدة كدة بيدخل اونلاين
طب هيفرق معاه لو دخل و تواصل مع محاسب هندي او مصري او تايلاندي ؟
لو كان الانجليزي بتاعهم كويس
و خدمتهم فعلا متقنة
و بيبعت الشغل فى ميعاده
و دقتهم عظيمة
و تواصلهم ممتاز مع الزبون
يبقى مفيش فرق
بل يعتبر ميزة .. لو كان سعره مثلا مثلا 5 دولار فى الساعة ؟؟؟ ( 90 جنيه مصري )
ده يعتبر بالنسبة لصاحب المطعم العجوز ده .. لقطة
بعد ما تفهم الاسباب الثلاثة دي كويس اوي
تخيل بقى نفسك شغال محاسب
و بتعمل حسابات يوميا لكذا مشروع فى كذا مكان
على الاقل مثلا قول ساعتين بس كل يوم
يعني 60 ساعة فى الشهر = 300 دولار شهريا
يعني مرتب لوحده كدة بتعمله جنب شغلك
و انت قاعد فى البيت حضرتك
لكن هل هتوصل للحكاية دي بسهولة ؟
لأ طبعا و بتاخد وقت
بس هل بتحصل ؟
بتحصل و ممكن لو بتشتغل على نفسك و بتحاول كل يوم .. ممكن توصل لأكتر من كدة
طيب تبتدي ازاي ؟
الخطوة 1 :
لازم تدرس لغة انجليزية و تقوي نفسك فيها كويس اوي
و تدرس مصطلحات المحاسبة و كلمات التعامل مع الزباين و كل ما يتعلق بالمجال
( و كل ما تلاقي ثغرة بالتعامل مع الزباين او غلطة .. تتعلم و تشوف وقعت فين و تطور نفسك فيها )
الخطوة 2 :
لازم تدور على كورسات محاسبة على يوتيوب ( بالانجليزي )
ازاي تعمل ميزانية و تعمل حسابات و كل تفاصيل المشاريع
بس تتعلم من الأجانب
لأن كدة هيبقى مستواك فى ذات مستوى المحاسب الأجنبي بالضبط
و هتكتشف ان 90% من كورسات المحاسبة الاجنبية .. مجانا !!
اه و الله !
و مش كدة بس .. ده لو دورت ممكن تلاقي كورسات شرح التجارة و البيزنس لجامعات عالمية امريكية و بريطانية .. و ساعات على اليوتيوب متاحة مش لاقية حد يسمعها
( لو عاوز نعمل موضوع مخصوصص للكورسات الأجنبية فى اي مجال , ابعتلنا على الصفحة و نعملك بوست مخصوص )
فالموضوع متاح .. خصص بس وقت كل يوم
و كوباية شايك .. دفترك .. ملاحظات .. و طبق اللى اتعلمته
و بعد شهرين كدة .. هتبقى فى حتة عالمية و مستوى خبرة ممتاز
و طبعا التعليم ده يستمر معاك طول الوقت
الخطوة 3 :
ابتدي طبق اللى اتعلمته و بالانجليزي بتاعك اعمل نماذج شغل فى مجالك
و اعمله فى مدونة .. اشرح بتعمل ايه
و خدماتك الممتازة
و ايه العروض اللى بتعملها
زي اي محاسب فى مصر بيعرض خدماته على اصحاب المشاريع فى مصر
اعمل كدة بالضبط بس فى مدونة تعملها و تملا محتواها بالانجليزي
حط فى المدونة كمان مقالات موجهة للزباين الامريكان .. تشرحلهم ازاي يعملوا كذا و يخلوا بالهم من ايه .. حاجات معلومات مجانية .. تفيدهم .. و تعرفهم انت فاهم فى مجالك و لا لأ
الخطوة 4 :
قسم شغلك لخدمات صغيرة .. ابتدي بأسعار عادية .. مش عالية
ركز فى الشغل اللى بيحتاج مجهود و اتقان
و اعرض خدماتك فى بروفايلك فى مواقع الفرى لانسر زي فيفر
و تابع كل يوم و فكر فى تطوير شغلك
و ابعت كل يوم و فكر ليه اترفضت ؟ و دور على الثغرة و قوي نفسك
و ابدع بقى و انطلق
يعني لو تعرف تعمل كتب PDF صغيرة للزباين الامريكية ؟ اعمل ..
اعمل فيديو صغير بالاجنبي ؟ ليه لأ ؟
ابدع و جرب .. و اتعامل كأنك خبير عالمي و معلم و احنا منك نتعلم :)
.. ليه لأ ؟ ما تستبعدش فكرة .. هتخسر ايه ؟ هتكسب خبرة اقل حاجة .. صح ؟
و مفيش حدود للتجربة و الإبداع
اشتغل كدة و ابتكر و ابدع .. وريهم الشغل بقى .. :)
و لو صادفتك اي عقبات ابعتلنا
و لو فيه اي حاجة مش واضحة عرفنا فى التعليقات
و ابعتلنا دايما بأسئلتك على الانبوكس
و لو السؤال شايف اجابته مفيدة .. خليك حبوب و شير البوست :)
انشره عندك و خلي الفايدة تعم عليك و على صحابك :)
هدفنا نساعدكم و ننقلكم خبرتنا البسيطة فى تسهيل طريقكم
اجابة لسؤال :إيه الاقتراح لمجالات لخريج تجارة محاسبة ؟
