لو إنت واحد عاوز تدخل مجال الفرى لانسر و لسه بتبدأ تتعلم مجال مجديد
فأنا حابب اقولك أول حاجة تحية ليك و برافو و كويس انك حددت مجالك و ابتديت تتعلم فيه
طريق الألف ميل يبتدي خطوة .. برافو انك بدأت و ان شاء الله هتوصل
.. امشي كل يوم خطوة و هتوصل
.. ثق في كدة تماما .. الموضوع مرتبط انك تمشي كل يوم خطوة .. لو عملت كدة .. هتوصل .. بإذن الله
نيجى بقى للسؤال
سؤالك الحقيقي هو :
ازاي اربط اللى بتعلمه فى مجال التطبيقات ( و الاندرويد .. مثلا )
عن طريق الشغل او التطبيق العملي فى الشغل و السوق
او :
" ازاي اطبق اللى اتعلمته و اعمل تطبيق ؟"
الاجابة بمنتهى البساطة و السهولة بعمل خمس خطوات
الخطوة 1 : ابحث .. هو الشغل مشاريعه ايه فى المجال ده ؟
ابحث مجالات العمل اللى بتنزل في أي موقع فرى لانسر أجنبي او عربي
و شوف ايه اكتر الطلبات اللى بتنزل :
فيه مواقع مفتوحة , و فيه مواقع الاشتراك فيها سهل .. و فيه مواقع بتنشر خدمات اللى فيها
.. شوف اي موقع من دول و ما تعملش اشتراك حتى
فقط خش و خد فكرة عامة .. شوف اغلب المشاريع ايه .. او اغلب الخدمات ايه
شوف برضه اعلانات طلبات التشغيل سواء فى النت او الجرايد
شوف بيطلبوا ايه
خش كمان على مواقع الناس التقال فى المجال .. شوف اغلب شغلهم بيعملوا ايه ؟
مثلا ممكن تلاقي اغلبهم بيعملوا تطبيقات ألعاب او تطبيقات جيمز أطفال
او مثلا تلاقي أغلبهم بيعملوا تطبيقات اخبار أو تطبيقات عرض أفلام
او تطبيقات دعاية او بيع منتجات
ممكن تلاقي بعضهم بيعمل خدمة مراجعة .. الخ الخ
مطلوب هنا بس تعمل بحث عام تعرف بيه ( من غير تخمين )ايه اغلب الحاجات
سجل اسم المشروع بشكل عام و نوعه ... هتلاقي حاجات كبيرة و صغيرة .. و حاجات معقدة و حاجات بسيطة ..
و اعمل بيهم قايمة
الخطوة 2 : نفلتر بقى .. و نرتب كدة
فلتر الحاجات دي .. كدة رتب الخدمات و المشاريع دي .. من الأكثر أهمية بالنسبة لك .. للأقل اهمية
معيار ده : هل هتكون مبسوط و فخور انك عملت الكلام ده ؟
ممكن مثلا ما تكونش مهتم من تطبيقات الالعاب ..
او ممكن تكون مهتم ..
انت عارف ايه اللى بتحبه من انواع التطبيقات او المشاريع
و ايه اللى مش بتحبه
رتبهم بقى من الأكثر اهمية ليك
للأقل اهمية
لو كانوا 100
فرقم 1 يكون الأكثر اهمية
الخطوة 3 : ركز
ركز على الأسهل فيهم
بعد ما تركز على اكثر مشاريع بتحبها .. اعزلهم من القايمة ( مثلا اكتر 5 - 10 مشاريع )
و شوف كدة بالبحث عنهم ... و التحرى اونلاين .. و سؤال الخبراء فى الجروبات
مين اسهل فى دول ؟
ممكن يكون تطبيق اللعبة اعقد من تطبيق عرض سوق الكتروني
او العكس .. شوف و دور
و رتبهم من الأسهل للأصعب
الأول فى القايمة يكون الاسهل ..
و الاخير هو الاصعب
و بنكرر :
كلهم مشاريع بتحب تعملها ..
الخطوة 4 : ابدأ شغل .. و قسم المشروع لمهام صغيرة
تبتدي تتعلم بالشغل ..
و اشتغل على أول مشروع ( الاسهل فيهم )
و فصصه لمهمات صغيرة اوي اوي ( جدا )
مثلا ( مثال ركيك شوية )
لو كان لعبة .. محمد صلاح بيجرى ورا كرة .. يبقى مثلا تفصصها لمهمة
( محمد صلاح بيتحرك لوحده / الكرة بتجري / لوجو ظهور كلمة جول لو عمل جول )
و تحاول تتعلم ازاي اعمل كل مهمة من دول مثلا
هنا تشتغل انك كل يوم بتتعلم و تطبق
انك ازاي تعمل حاجة صغيرة اوي
عشان تعمل المشروع ده ( الاسهل ) بالتدريج
..
الفكرة انك هتغلط و هتلاقي التطبيق ساعات مش زي الوصف
و هتقع و تغلط و تعك .. بس شوية شوية هتكتسب خبرة عظيمة فى مشروع عملي
و فى النهاية بعد وقت طويل او قصير .. هتخلص المشروع
و هتكون فرصة كويسة ترفعه فى مكان او حتى صور ليه
و تحطه فى البورتوفوليو بتاعك
الخطوة 5 : كرر و اكتسب خبرة
مع كل مشروع بتخلصه , تخش فى المشروع اللي بعديه (_ الاكثر صعوبة شوية )
و تفصصه بنفس طريقة خطوة 4
و تقعد كدة لغاية ما تخلص كذا مشروع
مع المشروع 10
انت هتكون مش فاهم كل الاندرويد .. صحيح !
بس هتكون فاهم كويس اوي ما يساعد انك تنفذ المشاريع ( اللى من النوع ده )
و مش كدة و بس
هتكون جاهز انك تدور فى مواقع الفرى لانسر
على شغل ( فيهم ) و هتكون قادر تنفذهم بكفاءة عالية
اه صحيح لسه ما خلصتش تعليم فى المجال
و لازم تستمر فى التعلم بنفس الطريقة دي و غيرها
و تخصص وقت ثابت للتعليم كل يوم
بس هتكون ربط التعليم بالتطبيق بشكل عملي
و بدأت تقدم و تحاول فى السوق و انت لسه بتدرس المجال
الحكاية مش سهلة .. انا عارف
و انا حاولت ابسط الموضوع قدر المستطاع
بس صدقني هتنجح لو خصصت وقت و جهد و اشتغلت فى اللي بتحبه
بالتوفيق و لو صادفتك اي عقبات ابعتلنا
و لو فيه اي حاجة مش واضحة عرفنا فى التعليقات
و ابعتلنا دايما بأسئلتك على الانبوكس في الصفحة
و لو السؤال شايف اجابته مفيدة .. خليك حبوب و شير البوست عندك و خلي الفايدة تعم عليك و على صحابك
و اعمل لايك عشان ده بيشجعنا لفايدة الغير
فقرة #Q&A
شروحات فرى لانسر
المقالة اجابة على سؤال" مساء الخير .. انا بس كان عندى سؤال لو تكرمتم الإجابة عليه .. انا حددت المجال وهو ( انشاء تطبيقات اندرويد ) وحددت اللغة وهى ( جافا ) وبالفعل بدأت اتعلم ومتابع دروس وبدأت مبدئيا بالخوارزميات قبل ما ابدأ باللغة .. بس السؤال هنا بقا .. انا مشتت من الأرقام والكلام دة كله .. عايز اعرف ازاى بعد م اتعلم دول هعمل برنامج يعنى بمعنى أدق محتاج توضيح بعد م اتعلم دول ايه اللى هيتم بعدها عشان ابدأ اعمل تطبيق ؟ واسف ع الإطالة ☺ "
