طبعا مشكلة كبيرة .. و المشكلة ان نسبة كبيرة من السكان و الشباب فى الدول العربية المحظورة مالهمش ذنب للحظر نتيجة عقوبات اقتصادية شاملة ( زي السودان ) او نتيجة أوضاع ارهابية مجرمة ( زي سوريا - ليبيا - اليمن ) و غيرها ..
و كمان استخدام VPN مش مفيد
لأنهم لدواعي امان الحساب بيلاحظوا اي دخول لبروفايلك من اي بيهات غريبة و بيبعتوا لك للتأكيد
طيب ايه الحل ؟
هل خلاص مفيش حل
مفيش مستحيل طالما فيه تفكير و ارادة و نيتك خير باذن الله
الحل الأول : البروفايل بإسمك
خلي وسيط ثقة يعملك البروفايل
العمل من خلال وسيط موثوق فيه يعيش فى دولة غير محظورةو يحبذ دولة أوروبية
و يحبذ يكون حد ثقة بتعرفه ( يفضل قريب او صديق أمين جدا )
فمثلا انت سورى و اسمك جمال .. مقيم فى سوريا
لكن اخوك / قريبك / صديقك سوري مقيم فى ألمانيا و اسمه مازن
ممكن تطلب منه يساعدك فى عمل بروفايل مؤقت من عنده
و متابعة العمل و الرسائل
- انك تجهز نفسك كويس اوي و تعمل بورتفوليو كويس
سواء لينكدين
او على بيهانس behance
او اي مدونة لعرض أعمالك
و ترفعها من بلدك طالما مواقع عرض الأعمال مش محجوبة
- انك تقوي نفسك جدا جدا فى المجال .. بحيث يكون قبولك و قدراتك جذابة للموقع و للزبائن بشكل قوي
فما تستعجلش على انشاء البروفايل .. قبل ما تكون مالك لقدراتك كويس اوي
طيب سؤال :
هل البروفايل المؤقت ده .. هدفه عمل ارباح ؟
الاجابة : هكون صريح معاك و اقولك احتمال ده ضعيف
لأنه غالبا بعد فترة - عدة شهور - upwork هيطلب عمل محادثة اونلاين معاك
و لازم تدخل خلال المحادثة دي من حسابك على اب ورك
و طبعا لازم تدخل من بلد انشاء البروفايل ... او بلد مش محظور
و المحادثة هتكون بالكاميرا و الميك
فساعتها احتمالية حظر لبروفايلك واردة جدا
سؤال :
طيب لزومه ايه بقى التعب و نعمل بروفايل مؤقت ؟
لعدة أسباب
1 - عشان تكسب خبرة و عدد ساعات تسجلهم فى الموقع manually
او مبالغ يتم جمعها فى الحساب
و تعمل ليها سكرين .. ده هيسهل فرص سفرك من سوريا لأقرب دولة اوروبية
لأنهم هيشوفوا عمليا انك واحد بيشتغل و عندك مهارات و اتعاملت مع اجانب
فواحد زيك اضافة يستفادوا منها جدا .. تخيل لو قدمت للسفر او الهجرة او اللجوء و عندك عدد ساعات على اب ورك 2000 ساعة رغم كل الظروف فى سوريا ؟
ده انت تبقى لقطة بالنسبة لهم و سوبر مان
2 - معرفة زبائن تقدر تاخدهم معاك برة موقع اب ورك لو الموقع حظرك
دايما تحاول تجمع وسائل تواصل بكل زبون يتواصل معاك قدر المستطاع
سواء ايميلات - فون - واتساب - فيسبوك - الخ الخ
القاعدة فى عالم الفرى لانسر .. انك ما تسعاش للفلوس
لأ خليك ذكي و اسعى للزبون اللى بيجيب فلوس .. توثيق الصلة مع الزباين هيسهل الدنيا جدا
3 - مين عارف ؟ مش يمكن مسافة ما البروفايل يشتغل و يكون فيه شغل و يطلبوا تأكيد اب ورك .. تكون ربنا سهلهالك و عرفت تسافر من سوريا ؟
ساعتها تقدر تكمل من حيث انتهى الوسيط الموثوق
الحل الثاني :
اعمل البروفايل بإسمه
اعمل تحالف مع قريب او صديق ثقةانه هنا هو اللى هيكون البروفايل على اسمه
بس انت فعليا اللى بتعمل كل الشغل
هو مجرد واجهة :
مازن - مقيم فى ألمانيا
بينما الشغل بيعمله جمال فى سوريا
هو اللي يتواصل كتابة شات مع الزبون و يبعتلك يوميا تقرير بالشغل اللى عمله
و انت اللى تتواصل صوتيا مع الزبون ( لو اضطرت ) بس غالبا مش هيلزم ده
طيب بالنسبة لسحب الأموال
هو يقدر يسحب الأموال فى ألمانيا عادي من اي وسيلة سحب بإسمه هو يقدر يطلبها و يربطها بالبروفايل
ثم يحولها لك بنفس الطرق اللى فيها السوريين اللى خارج سوريا بيحولوا او بينقلوا الفلوس او الدعم للأهالي داخل سوريا
الحل الثالث :
إنشاء موقع مستقل بيك و عرض خدماتك و تسويقها فيسبوك
هنا بتعمل موقع من خلال مدونة و تنزل فيها شغلك و تعرض خدماتك
و تدور على جروبات الزباين فى الفيسبوك و الجاليات و تعرض خدماتك بأسعار رمزية
هنا بتحاول تبني لنفسك اسم و براند و تعمل لنفسك شبكة زباين
و تعملهم خدمات بأسعار جميلة جدا ..
تقريبا خدمات شبه مجانية ليهم
بس مش هتجمع فلوس او صعب ..
لكن هتعمل شبكة زباين تكون جاهزة لشغلك لما ان شاء الله يتفك الحظر
و تنزاح الغمة
فإنت كدة كدة وقت بيضيع .. نقول على ما يتفك الحظر هيعدي تلات سنين ؟
طيب استغل التلات سنين دول فى تكوين شبكة زباين ممتازة
بحيث اول ما يتفك الحظر .. الموضوع ما ياخدش اكتر من شهر او شهرين
و تبقى كأنك على قمة هرم كنت بتبنيه فى الظلام من سنين
لأن عملية بناء الثقة مع الزباين هي اكتر مرحلة بتاخد وقت فى مسار الفرى لانسر
و ان شاء الله تنزاح الغمة قريبا جدا .. خليك متفائل و ارادة من حديد مهما كان الليل ظلام
الحل الرابع :
لو اتسدت خالص .. اتعلم و اتعلم و اتعلم
هما لو مانعينك تبعت شغل او تشتغل
مش هيقدروا يمنعوك تتعلم ..
استعين بأصدقائك و اعرف ايه اكتر مجال مطلوب و اتعلمه
تخيل خلال التلات سنين او السنة دي .. و انت بتتعلم كل يوم مجال
و تخيل بعد 12 شهر
و انت بقيت محترف فوتوشوب و خبير اندرويد و متخصص وردبريس
و مبرمج باثيون و فنان ثري دي
تفتكر بعد رفع الحظر .. هتكون بقيت ازاي ؟
هتكون بقيت زي هولك الاخضر .. العملاق الرهيب المتميز و اللى يكتسح اي فرى لانسر على مستوى العالم باذن الله :)
و هتبقى نمبر وان فى خلال شهور معدودة :)
و خصوصا لو عملت الحل 3 معاها
هتكتشف ان المحنة اللى انت فيها هيا اللى حولتك لأغلى ماسة فى عالم الفري لانسر
و انها كانت فرصة لصناعتك لنفسك كفرى لانسر متميز متعدد المجالات .. اي زبون يلاقيه .. يحس انه لقى هدية من السما .. فرى لانسر يصمم و يعمل شغل مواقع و برمجة .. و بسعر منافس .. واو .. وصلتك الفكرة ؟
يمكن هما منعوك من عمل الأفضل .. ماشي .. معلهش .. لكن
مش هيقدروا يمنعوك من تحصيل الممكن .. أبدا أبدا
حط لنفسك برنامج .. بمستويات و اشتغل كل يوم .. و بالمتاح
و فى خلال شهور .. شوف نفسك كنت فين و بقيت فين :)
الخلاصة :
و ما لا يدرك كله لا يترك جله
و اعرف ان في داخل كل محنة .. منحة
و ان الدنيا لو ضاقت عليك .. .. بيكون لهدف انك تطلع من نفسك أفضل الممكن
و تدور ازاي تقدر تلاقي فرصة متاحة ليك تركز فيها ... الباقيين ما يقدروش يركزوا فيها زيك ...
و تمنياتنا بالتوفيق ليك ..
و دعواتنا ليكم بالخير و الحفظ فى رعاية الله دايما
. و يرزقكم الخير الوفير بحق الشهر الكريم أمين
و باذن الله كل الشعوب العربية الحرة الرائعة هتنتصر ضد الظلم و الظلام و الدمار
عن طريق حب الحياة و الإيمان و العزيمة و البناء و الحرية و المستقبل
.. بكرة بتاعنا بإذن الله
تفاءل .. تفاءل و اصمدوا و النور جاي
.. حاول و اسعى بالممكن و الجاي أحسن
و ابعتلنا لو احتجت اي شيء فى الكورسات .. او كان فيه صعوبات فى النت للبحث
.. عرفنا و ابعتلنا قايمة اسماء البرامج او المجالات اللى حابب تتعلمها فى انبوكس الصفحة
و احنا ندورلك عليه مخصوص و نبعتهولك لغاية عندك
.. و اي عقبة فى طريقك .. هنحاول نساعدك على قد ما نقدر بإذن الله :)
و بالتوفيق
المقالة اجابة لسؤال
اخي استفسار صغير لو سمحت بالرغم من اني لم ابدا بعد ولكن انا في سوريا ونحن كما تعلم ليس معنا سوى الله وكل البلدان حظرونا اقتصاديا ففي هكذا حالة مثلا كيف سأحصل ما اجنيه من المال في الانترنت ؟ وشكرااا جزيييلا
