فى أوقات الحر و الصيف و الموجات الحارة الشديدة - زي الأيام دي -
بيواجه الفرى لانسر حالات انقطاع الكهرباء اثناء الشغل
و الموجات الحرارية و ارتفاع درجة حرارة الصيف نتيجة لظاهرة الاحتباس الحراري
و من واقع التجربة الشخصية .. بنقولكم حبة نصايح للفرى لانسر ( القدام أكتر )
و اظن هتفيدك اثناء الشغل فى الأيام الحر .. و النصايح منوعة من حالات الشغل الخفيف للشغل التقيل
و انت تختار النصايح اللى تفيدك
النصيحة 1 :
قسم أوقات الشغل و الراحة فى الأيام الطارئة
اعرف مسار درجات الحرارة على مدار اليوم
و تخلي أغلب اوقات الراحة فى النهار ( قيلولة - العصرية )
بينما أغلب أوقات الشغل و التواصل فى الليل او ابتداء من وقت الفجر لغاية الظهر
دي بتكون أوقات انقطاع الكهرباء فيها قليل
و كمان درجة الحرارة بتكون فيها منخفضة
تقدر تعرف اوقات درجة الحرارة مسبقا لليوم و بالساعة من هنا
و بصفة عامة الموقع ده يعتبر ادق موقع تعرف منه درجات الحرارة الحقيقية من دلوقتي و لأسبوع قدام
النصيحة 2 :
اشتغل على اللاب توب
فيه فرى لانسر اعرفهم بيشتغلوا على جهاز كمبيوتر و عندهم لاب توب للطواريء ...
ده وقت الشغل على اللاب توب للطواريء
عشان لو حصل انقطاع كهرباء .. شغلك ما يضيعشي
سواء تصميم او ترجمة او كتابة او برمجة
النصيحة 3 :
جهز باقة نت hotspot
لو كنت بتسلم شغل .. نصيحة ما تستهلكش باقة الموبايل الايام دي .. و خلي اغلب تصفحك للنت من واي فاي
و وفر استهلاك الباقة لحالات انقطاع الكهرباء
لأنك ممكن تستخدم موبايلك كنقطة اتصال او راوتر مؤقت لو النور قطع
شخصيا أوقات كتير بستخدام موبايلي كنقطة hotspot
و احوله لمصدر نت مستمر لمدة بسيطة تشغل عليها اللاب توب
و بتساعدني اعرف ابعت شغل او رسالة على الفرى لانسر فى اوقات ضرورة
و بالمناسبة باقة النت موبايل عندي 15 جنيه فى الشهر بس ( مش مبلغ كبير )
و التلات شبكات ( اتصالات و اورانج و فودافون ) هتلاقي عندهم النظام ده تقدر تشتريه بسهولة حسب استهلاكك اكتر طبعا
فالموضوع تكلفة بسيطة لكن بتفيد وقت الزنقة و الطواريء جدا جدا ( عن تجربة )
النصيحة 4 :
لو بتشتغل على جهاز .. احفظ .. سيف .. احفظ !
اوقات كتير بتكون بتشتغل و النور يقطع و تقعد تتضايق عشان الشغل بتاع ساعتين ضاع
هنا بنفكرك .. دايما اعمل حفظ .. سيف باستمرار
و لو كان شغلك فى برنامج كتابة او ترجمة ... فيه خاصية لكل برنامج للحفظ التلقائي كل مدة معينة ( مثلا 5 دقايق ؟ )
فعلها عشان تشتغل معاك
النصيحة 5 :
جهز لنشاط وقت انقطاع الكهرباء
نزل كتب على الموبايل بتاعك تقراها لما النور يقطع
او فيديوهات تحفظها او تمارين لغة
او حتى العاب تلعبها اوفلاين ( كفترة راحة لو حصل انقطاع الكهرباء و انت بتشتغل )
بشكل عام ما تخليش انقطاع الكهرباء يوقفك عن شغلك او نشاطك
اتعامل عادي و جهز نشاط ليه تعمله مع كوباية عصير كدة و روقان
و هتتفاجيء بقى سبحان الله لما تعمل كدة .. ان قطع الكهرباء مش هيطول معاك .. هيا كدة الدنيا .. ما تفهمشي :D
النصيحة 6 :
لو تعرف تشترى جهاز UPS اشترى
ده فى حالة جهاز كمبيوتر بتشتغل عليه و محتاج توصله UPS
بس غالبا هيكون مكلف جدا و هيستلزم توصله على الراوتر
و مش هيستحمل اكتر من نص ساعة بالكتير
لهذا لو تشترى بيه لاب توب هيكون افيد و احسن و اوفر ( لو عايز رأيي )
لكن لو كان شغلك ما ينفعش على لاب توب و لازم جهاز تقيل ( زي اجهزة الماك و كدة )
.. يبقى ساعتها هيكون عائد شغلك كافي جدا انك تشترى جهاز UPS ..
و اظن هو ضرورة اكيد ليك مش عايزة كلام و هيوفر وقت و مجهود جدا جدا
النصيحة 7 :
روح على coworking space
ده لو لقيت قطع الكهربا كتير اوي في نفس اليوم
و كان الشغل عليك كتير اوي و الموضوع بقى مزعج جدا
هنا انصحك
و تدور على اي مساحة Coworking space حواليك قريبة من جوجل
اكتب cowork space near me
او coworking space near me
او coworking space
و اكتب اسم منطقتك
و تتصل بيهم و تستفسر هل لسه شغالين ( فيه بعض الاماكن بتكون قفلت فتتأكد )
و كمان تستفسر سعرهم كام فى الساعة او اليوم
ثم تاخد لاب توبك الحلو ده .. و الشنطة .. و هيا بنا نعمل
اتمشى و روح و اقعد اشتغل شوية..
تخلص مهماتك
و ترجع البيت يا بطل
و لو عندك نصايح تانية .. شاركنا بيها فى التعليقات
و لو المقالة فادتك .. فده شيء يسعدنا .. و يسعدنا لو تشير المقالة و تفيد بيها غيرك
و ربنا يعدي الأيام دي على خير و يوفقكم جميعا فى شغلكم
