السؤال ده متكرر كتير اوي .. و هو سؤال معقد
تعالوا طيب نجاوبهم جزئية جزئية
السؤال 1 :
ايه اكتر و اسرع مجالات مطلوب كفرى لانسر ؟
كل المجالات مطلوبة .. و نسبة الطلب بتتناسب عكسيا مع سهولة المجال
يعني لو كان المجال سهل تعلمه
.. فيبقى اللي جاهزين يعملوا الشغل كتير
فبيبقى سعر المشاريع فيه اقل من المجالات التانية
بينما لو كان المجل صعب تعلمه و اتقانه ..
و اللي جاهزين يعملوا الشغل فيه قليلين
فيبقى سعر المشاريع فيه أعلى بكتير من المجالات التانية
مثلا لو مجال داتا انتري ( كتابة و تفريغ بيانات مكتوبة من صور مستندات مثلا )
دي سهل تتعلمها فى اقل من اسبوع
فيبقى لما تدخل المجال .. هتلاقي فيه مثلا مليون واحد داتا انترى
يستتبع ذلك ان المشاريع اللى هتنزل هتكون اقل
و لو نازلة كتيرة .. هيكون سعرها اقل
بينما لو مجال برمجة C+ ده مجال معقد و صعب و تقيل
و احيانا تعلمه بياخد شهور
فيبقى لما تدخل المجال هتلاقي مثلا الف واحد بس
و المشاريع اللى بتنزل هتكون نفس الرقم او اكثر حتى عشر اضعاف
بس الشغل يكفي الجميع و سعره عالي كمان اوي
اتمنى تكون وصلت النقطة
سهولة التعلم لأى مجال بتتناسب عكسيا مع المكسب
الحكاية مش إنك "تكسب فى اسرع وقت "
.. الحكاية تكسب "قد ايه "
فكر على المدى الطويل .. تكسب صح
السؤال 2 :
طيب اتغلب ازاي على صعوبة التعلم .. ازاي اتعلم و اتقن المجال بسرعة ؟
السر هو فى كلمة واحدة :
انك تكون بتحب المجال فعلا
لو بتحب المجال .. ساعتها تعلمه هيكون أسهل عليك من اي حد تاني
لو بتحب المجال .. هتقعد ساعات اكتر تتعلمه تلقائي
الموضوع هيبقى لذيذ و التعب بتاعه مش هتحس بيه خالص
و هتكون اسرع فى تعلمه من اي حد تاني غيرك
السؤال 3 :
تعرف منين انك بتحب المجال فعلا مش عشان الفلوس ؟
ببساطة فكر " لو مفيش فلوس .. هل هنبسط و استمتع بالتعلم ده ؟ "
هل انا فعلا عاوز اتعلم اعمل تطبيق اندرويد او برنامج ؟
هل هنبسط لو رسمت اللوحة دي ؟ او عزفت المزيكا دي ؟ هل هنبسط لو عملت التصميم ده او النقش ده ؟
السعى للانجاز و الانبساط بيه = سر حب المجال = الاتقان
و بعدها بيؤدى لنقطة التميز
يعني ايه اتميز فى المجال ؟
الفرى لانسر بيكافيء اللى يتميز فى مجاله .. انه بيطلب من الزباين اكتر
المتميز فى اي مجال نسبة لا تزيد على 10% مثلا
فدول مع الوقت و خبرتهم المتزايدة و اتقانهم للعمل بحب
بيزيد سعرهم عن غيرهم فى نفس المجال
فالتميز سره الحب و عشق المجال
دي المعادلة اللى حاولت اشرحها ببساطة
جايز البعض يستسهل و يقولك اتعلم اي حاجة .. انجز .. بلاش تضييع وقت
بس الطريق الصح
بيودي لنتايج صح
و على فكرة .. هو طريق صح و سهل
مش سريع ممكن .. بس صح و سهل ..
و هيعمل فعلا الهدف برضه : تحقيق مكاسب مادية محترمة و مرضية ان شاء الله
جرب و امشي فى الطريق ده .. و ان شاء الله مش هتندم
دي خلاصة تجربة سنوات و محاولات و خطأ .. و احنا معاك
و لو صادفتك اي عقبات ابعتلنا
و لو فيه اي حاجة مش واضحة عرفنا فى التعليقات
و ابعتلنا دايما بأسئلتك على الانبوكس
و لو السؤال شايف اجابته مفيدة .. خليك حبوب و شير البوست :)
انشره عندك و خلي الفايدة تعم عليك و على صحابك :)
و اعمل لايك عشان ده بيشجعنا لفايدة الغير
هدفنا نساعدكم و ننقلكم خبرتنا البسيطة فى تسهيل طريقكم
هذه المقالة اجابة على سؤال ايه اكتر واسرع مجالات مطلوبة كفري لانسر
عشان اتقنها واشتغلها واقدر اكسب منها في اسرع وقت؟
