ايه أهم قواعد قبول منتجاتك فى منصة envato ؟ (1 - 2)

ناس كتير بعتت تسألنا  بخصوص ازاي ارفع ملف  على موقع envato و تكون فرص قبوله عالية ؟
هنحاول هنا نشرح لك اهم قواعد قبول منتجاتك و ملفاتك و شغلك اللى عاوزه يتباع .. على منصة envato 

خلينا نبتدي اول حاجة بخصوص منتجاتك ان لازم يكون فيها سمات اساسية  و نقاط أساسية بخصوص منتجك  

1 ||| 
السمة الأولى 

خلي منتجك فكرته مطلوبة .. و يكون نادر التواجد بالمنصة 

بمعنى ؟
من اكتر اسباب الرفض  انك تكون عامل شغل حلو بس  يكون فيه زيه و شبهه كتير فى المتجر  ..  
فمثلا لو بتعمل ملف للبيع فى graphicriver : لازم يكون المنتج اكيد مش ايقونات الفيسبوك و قوالب مواقع مستهلكة 
و لو كان ملف فى themeforest : لازم يكون المنتج مش برمجة صفحات شخصية او Coming soon 
لأنها فكرة منتشرة جدا 

ركز على فكرة تكون مطلوبة برة المتجر 
و ما يكونش ليها تواجد كتير فى المتجر

لو كل الشارع محلات كشرى ..  افتح محل فول 
و لو كل الشارع محلات فول .. افتح كشرى ..
لو فتحت زيهم .. اكيد مش هتلاقي فرصة !

2 ||| 
السمة الثانية 

خلي منتجك متقن و مبهر شكلا جيد جدا 

ازاي ؟
متجر envato بيكسب من بيع منتجك زيك بالضبط .. عشان كدة عاوز سمعته تفضل ان فيه منتجات ممتازة  و فوق الممتازة و متقنة .. عشان كدة بيحرص على الاتقان فى التفاصيل عشان سمعته تفضل عالية 

فلو منتجك برمجة .. الكود يكون مترتب و مفيش عشوائية سطور .. 

و لو تصميم .. لازم يكون شكله احترافي و موازي لأحدث النواحي التصميمية  و عالمي مش  موضة تسعينات 

ركز على اتقان منتجك و انه جديد لكن بيحتذى القواعد العالمية قد ما تقدر شكلا اولا  على الأقل 

و مطابق لمواصفات الجودة 

و إلا هتلاقي رسالة زي دي :

Unfortunately your submission doesn’t meet our current minimum quality requirements for the category it was submitted to. Please consider taking some time to familiarize yourself with our current library and quality levels of popular items before resubmitting

دي اكتر رسالة منتشرة و بتوصل لناس كتير ..

بالنسبة لنقطة الاتقان .. فلازم مثلا لو كان تصميم يكون العمل متقن قد المستطاع 

يعني لو الخط بيتعمل بنقطتين و انت حاطط تلات نقاط .. بيعتبروها نقطة تقلل من اتقانه
اسماء اللايرات layers لازم تكون مترتبة و مرقمة و متوزعة صح داخل ملف التصميم 

لو كان طباعة .. لازم تحدد الهوامش فيه بدقة ..

و الا هتلاقي رسالة زي دي :

The envelope isn’t print ready when it is set up like this. You need to provide a template of an unfolded envelope with a die cut layer as envelopes are printed before they are folded

و تسمية ملفات العمل نفسها - داخل الملف المضغوط - تكون دقيقة ..
و الا هتلاقي رسالة زي دي :

The preview image set here is still incorrectly labelled. They should be labelled as such “xx_aname.jpg” where xx is a leading double digit number starting at 01

3 ||| 
السمة الثالثة

الحقوق الفكرية داخل تصميمك 

حتى لو تصميمي ؟
ايوة ..  بما انه بقى بتبعته عشان يتباع :
 .. فما ينفعش تستخدم مثلا صور مأخوذة من النت من مواقع تانية ..و ليها حقوق استخدام
ما ينفعش تحط فيه مثلا خطوط مش مجانية ضمن الملف التصميمي
ما ينفعش تبنيه على جزء من تصميم بيتباع و انت جاي تعدل فيه حاجة
بيدققوا اوي فى التفاصيل دي .. عشان المتجر قانونيا لو نزل حاجة زي كدة 
هيكون من حق صاحب الحاجة الاصلية يرفع عليهم قضية و يطلب تعويض لأنه تضرر 
و هيكسبها 
فبيراجعوا النقطة دي بالذات مرات و مرات .. فراجعها قبلهم 
و الا هتلاقي رسالة  زي دي :
Please remove the font file, and the license.txt from the main download file

و لازم تحط روابط الخطوط المستخدمة و نزلتها من فين و اثبات انها مجانية 
و الا هتلاقي الرسالة دي :
Please also add the font link to the item description

الدقة هنا فى حقوق الناس الفكرية ضرورية .. لأن ده استخدام تجاري مش لتصميم شخصي عادي او شغل بسيط عابر 
ده تصميم لو اتباع .. هتكسب منه الوف و انت قاعد فى بيتك .. لهذا التدقيق مطلوب جدا جدا 

4 ||| 
السمة الرابعة

الهدايا ممنوعة 

بمعنى ؟
بمعنى الهدايا زي Bonus و كدة مرفوضة فى envato فما ينفعش مثلا تقول : التصميم كذا و معاه ايقونات هدية او ملف التصميم ده هدية .. مرفوض تماما .. لأنها منافسة غير متوازنة بينك و بين بقية المصممين و البائعين فى envato 
و الا هتلاقي الرسالة دي :
Please remove the word “bonus” from the preview image and from the item description

ركز فى منتجك فقط .. العروض الجانبية مالهاش لزوم و هتترفض 

5 ||| 
السمة الخامسة

ممنوع وضع شعارات تجارية او ماركات 

زي ايه  ؟
ممكن يكون فى التصميم ايقونة او اتنين فيهم مثلا شعار فيسبوك او تويتر .. لكن الاكثار منهم اكتر من اللازم ممكن يرفض التصميم كله .. لو مثلا لاحظه ان التصميم كله عبارة عن صفحات و فيها ايقونات كبيرة واضحة فيها شعار المواقع المشهور زي pinterest او تويتر او انستاجرام ..  بدون داعي 
فممكن تجيلك رسالة زي دي :

Due to the high number of social media icon sets submitted to GraphicRiver, we can only accept icon sets with unique design aspects or exceptionally high qualityYou cannot drastically change the item in an update. You have doubled the number of icons. Also, we do not allow logos from companies that are not social icons, such as Apple, PayPal, Evernote, Android, etc

6 ||| 
السمة السادسة

وفر كل الامتدادات المطلوبة 

امتداد واحد مش كفاية ؟

أيوة .. عشان envato عاوز تجربة الشراء منه تكون ممتازة زي ما شرحنا ..
فما ينفعش مثلا توفر امتداد واحد لو كان تصميم سواء PSD او AI  و بس 
 لا  لازم تكون في كذا صيغة  كمان  زي PNG او JPG او PDF  او EPS  لإرضاء جميع الاذواق 
نوع فى انواع الـ Format المطلوبة 
و الا  تجيلك رسالة زي دي :
The compliment card is missing in eps format

7 ||| 

السمة السابعة

ادعم كل النسخ قد ما تقدر 

اغلب التصميمات بتكون لكذا نسخة .. يعني مثلا يشتغل على كذا اصدار من نفس البرنامج 
فلو عملت التصميم و ما ينفعش يتفتح غير على فوتوشوب قديم .. مش هيتقبل 
لازم يكون بيشتغل على فوتوشوب CS4   .. CC  و كل الاصدارات 
نفس الشيء لو كان فيديو او برمجة .. يشتغل على كل المتصفحات مش كروم فقط او فاير فوكس 
دي بديهية لكن البعض بينساها للأسف 

فى الجزء التالي هنتكلم فيه عن تفاصيل القواعد التفصيلية  بالصور عن قبول التصميمات مثلا بيتم ازاي 
لكل نقطة على حدة قد ما نقدر ..
تابعونا دايما ..
بالتوفيق :)

مصادر الشرح :

A step-by-step guide to the upload process

How to become an author in Envato market in 2 minutes

Tips for Marketplace Authors

how to upload template in themeforest