هنا هنشرح بالتفصيل خطوات ازاي تشتغل تدريس كـ فرى لانسر بطريقة محترفة
فى الجزء 1 : هنشرح هنا تدريس لغتك العربية ( حتى لو كنت مش مدرس عربي للأجانب ) ..
و ازاي تبني نفسك تدريجيا و تأخد اجر فى الساعة لا يقل عن 10 دولار فى الساعة
ايوة بالضبط زي ما قريتها ( 3 دولار فى الساعة ! ) و ده كمان : على الاقل !!
و تقدر تسحبهم عن طريق الباى بال ( و لو فيه طرق تانية لقيناها هنعرفكم بيها اول بأول )
و عشان تعرفوا انه كلام اكيد :
فيه مصريين و عرب بيشتغلوا على الموقع ده و مضبطين اجرهم فى الساعة لغاية 8 دولار كمان فى الساعة الواحدة
بس طبعا لازم تفهم ان الكلام ده مش بييجي كدة من الهوا او انك تعمل اشتراك و تقعد كدة مريح و تستلم الفلوس
الموضوع محتاج شغل مستمر , و خطوات مدروسة و سليمة
نبتدي و نشرح الموضوع واحدة واحدة .. ع البركة :)
1 ||| الخطوة الأولى :
ايه فكرة التدريس العربي للأجانب ؟
ده الموقع اللى هيكون منصة العمل عليه .. فيربلينج :
فكرة الموقع باختصار جت من ايه ؟
ببساطة تخيلوا الاتي و فكروا كواحد امريكي عنده المشكلة دي :
انا مثلا واحد امريكي او اوروبي , نفترض اني بحكم جتلي سفرية سياحة او شغل مفاجيء
لقيتني هزور بلد مثلا فى المنطقة العربية او فى اسيا او افريقيا .. يبقى لازم اعرف لغتها و لو حتى مباديء اولية ..
صح ؟
طيب انا امريكي .. عشان اعمل الحكاية دي .. لازم اروح مركز تعليم لغات بقى او اجيب مدرس بالشيء الفلاني يعلمني العربي او السواحيلي او الصيني !!! و شوف بقى بياخد كام فى الساعة , ده غير تضبيط المواعيد .. ده غير اني مش فاضى اروح و اجي لأني اكيد عندي مشغوليات تانية اقلها بنرتب للسفر او ورايا شغل كتير مثلا .. و ده لو لقيت مدرس لغة متخصص بسهولة
لأنك ممكن ما تلاقيش مدرس عربي قريب منك فى نفس المدينة .. ممكن تلاقيه فى مدينة تانية او ولاية تانية !!
طب و بعدين يا امريكي ؟ ده انا مش عاوز اتعلم اللغة بريمو .. انا بس عاوز اتعلم الاساسيات
يعني صباح الخير - مساء الخير - لو سمحت تاكسي - الفندق كام ليلة
حاجات بسيطة افهمها , او اقولها ...
هنا بقى جت فكرة الموقع
الموقع وسيط :
بيقول للامريكي ده .. اتفضل عندنا
- هتلاقي ناس من اهل اللغة نفسها ( مصريين و عرب ) بينطقوا العربي بشكل صحيح و سليم و الحروف سليمة
- و يقدروا يعلموك اللغة و بلهجتها كمان حسب ما تحب
- و كمان اجرهم منخفض جدا فى الساعة مش بيوصل لـ اجر الساعة الخصوصي للمدرس الامريكي مثلا
- و كمان تقدر تتعلم و انت فى بيتك يا امريكي بكل سهولة فى الويك اند مثلا
و على الناحية التانية بقى ؟
انا مصرى او عربي .. عارف عربي بشكل معقول و لغة عربية بشكل معقول , اعرف اقرا و اكتب بيها و ممكن كمان اكون بدرسها كمان ( ده اكيد ) ... هستفاد اني و انا فى بيتي :
- هعلم واحد امريكي او اوروبي .. لغتي العربية بكل سهولة فى خلال ساعة واحدة بس ( 60 دقيقة )
- هستفاد فلوس للساعة عن شغل بسيط كأني بعمل شات فيديو مع واحد صاحبي اجنبي
- هقوي لغتي الانجليزية كمان مجانا باحتكاك مباشر سهل مع اجانب !
- هتعرف على ناس اجانب و هكتسب خبرات و معرفة اكيد من حوار معاهم اثناء التعليم
و على ذلك فالموقع بيسجل فيه اتنين :
النوع الاول : واحد عاوز يتعلم لغة من ناطقيها ( من اهلها )
و ده ايا كانت اللغة ( انجليزي - فرنسي - صيني - الماني - الخ الخ )
النوع الثاني : واحد مستعد يدرس اللغة بتاعته للآخرين مقابل اجر مادي بالساعة
طيب النوع الاول يقدر يسجل بسهولة
لكن النوع الثاني مش سهل .. و لازم له خطوات عشان يقدم الطلب
ازاي ؟
هنشرحها الخطوة الجاية
بس مهم جدا قبل ما ندخل فى الشرح لازم تكون جاهز بثلاث حاجات
1 | حساب باي بال مفعل و جاهز :
بمعنى جاهز و مفعل و مجرب منك للسحب منه , بإيميل محدد جاهز تبعك و نفس ايميل الباي بال هو ذات الايميل اللى هتستخدمه للإشتراك عشان يتم قبوله فى حسابك كمدرس بسهولة
( لأنك لو استخدمت ايميل مختلف للتسجيل عن ايميل الباى بال ساعات بتعمل مشكلة فى سحب الارباح , لهذا الحكاية دي لازم تكون جاهزة من الأول ) و لأن وسيلة السحب الاساسية و الاسرع هنا هي باي بال لسه فيه وسائل تانية هيتم اضافتها مستقبلا و فيه تفاوض بين بايونير و الموقع , لكن حاليا جهز باي بال اساسي معاك
2 | لغة انجليزية كافية للمحادثة :
مش لازم تكون بتتكلم لبلب و لا طليق فصيح شكسبير او مورجان فريمان :D لكن يكفي تكون لغتك الانجليزية كافية انك تعرف تتكلم لمدة 20 دقيقة مع التلميذ بمعنى تفهم هو بيقول ايه , او تعرف تستوضح منه , و هو كذلك يفهم منك تقوية اللغة الانجليزية نطقا و محادثة .. عملنا ليها موضوع شرح تقدر تشوفه من هنا و تابعوا الكورسات اللى هننزلها لتقوية لغتك الانجليزية و اللغات عموما من هنا
2 | تسجل لنفسك فيديو و ترفعه على قناتك يوتيوب :
ببساطة من خلال كاميرا اللاب توب , او من خلال كاميرا ويب كام بتشتريها ( رخيصة و متوافرة ) و تسجل لنفسك تتكلم فيه خلال دقيقة او اقل عن نفسك مخاطبا كل زوار موقع فيربلينج عن نفسك كواحد بيدرس العربي للأجانب المتحدثين للغة الانجليزية
و دي امثلة لفيديوهات مصريين شوفها بنفسك هنا و هنا
بالنسبة للزميلات من الفرى لانسر اللى مش حابين فكرة يسجلوا فيديو ليهم و برغم ان فيه زميلات محترمات سجلوا فيديوهات ليهم و شغالين بكل احترام بيدرسوا سواء اجانب او اجنبيات فقط و امثلة ليهم: https://www.verbling.com/teachers/reemsabry
https://www.verbling.com/teachers/95601283758336948460
لكن ممكن جدا تعملي زي الامثلة دي لمدرسات , ما وضعوش صورتهم زي هنا
و رفعوا فيديوهات ليهم عبارة عن شرح لسيرتهم الذاتية بشكل موسيقى عادي زي كدة :
الموضوع ما فيهوش عائق بعون الله , طالما فيه :
عزيمة , اصرار , تفكير فى كل مشكلة و طرح حلول مبتكرة ليها :)
جهزت فيديو ليك ؟
جهزت الباي بال ؟
جاهز بلغة انجليزية جيدة للمحادثة الصوتية ؟
يلا بينا ننطلق .. ع البركة
2 ||| الخطوة الثانية :
التسجيل بالموقع
1 ) هندخل من رابط الموقع من هنا :
www.verbling.com
هتدوس Apply
هتكتب فى خانة First name اسمك الأول فقط , يعني لو كان اسمك " محمد علم " هتكتب : Mohamad فقط
( مهم جدا : خلي كتابة اسمك هنا زي اسمك الاول فى حساب باي بال اللى جهزته )
و هتكتب فى خانة الايميل : ايميلك ( ايميل حساب باي بال زي ما قلنا )
و فى خانة الباسورد : هتحدد باسورد حسابك عادي زي ما تحب و تفتكره طبعا
هتكتب هنا فى الخانة الاولى : تختار العربية ( تكتب : Arabic ) على اعتبار دي لغتك الاولى اللى تتحدثها بطلاقة و لغتك الأم
ثم تختار فى الخانة التانية اللغة اللى انتي بتتعلمها فى الموقع من خلال الاحتكاك مع الاجانب اللى هتدرسلهم و بتطورها معاهم و تختار English فقط
هنا فى خانة الاسم الاول : هتكتب اسمك الاول فقط ( لو محمد علم تكتب : mohamad ) ( و زي اسم الباي بال )
فى الخانة التانية : اسم الوالد مثال : لو محمد علم تكتب هنا : Alm ( و برضه زي ما هو فى حساب الباي بال )
فى الخانة التالتة : رقم الموبايل الخاص بحضرتك
فى الخانة الرابعة : اللغة اللى هتدرسها ( لو ما كانش تم اختيارها )
فى الخانة الخامسة : هل تحب تدرس لفصل كامل او مجموعة
( وارد يتقدم لطلبك مجموعة ناس يتشاركوا فى سعر الساعة , مثلا من المكسيك طلبة فقراء او شلة اصدقاء
تختار موافقة طبعا :D ! الا لو انت مش بتحب الدوشة براحتك عادي :D )
فى الخانة السادسة : تحط رابط تسجيل الفيديو اللى قلنا تجهزه و ترفعه على قناتك اليوتيوب قبل ما تبدأ التسجيل
هنا بقى بتحط فى الخانة الاولى :
وصف خبراتك التدريسية , سواء مهنية او تطوعية , حتى لو محو امية فى جمعية رسالة اكتبها
حتى لو كان درس تطوعي , حتى لو كان شروحات عملتها فى مدونة و ممكن تكتب عبارة عامة زي
لدي خبرة جيدة بالتدريس و بالتعليم اللغوى لمدة كذا سنة مثلا
او لو لسه جديد مش ملزم تذكر السنوات .. الفكرة صياغة بتقدم بيها نفسك كمدرس جيد و كفء واثق فى قدراتك
فى الخانة التانية :
تكتب الاماكن اللى تخرجت منها ( سواء لها علاقة بالانجليزي او لأ )
او الكورسات اللى اخدتها من مراكز او جامعات او اي شهادة عندك او تدريب اخدته ( بروز نفسك كدة كواحد محترف )
و بعدين تدوس ضغط و ترسل الطلب
كدة الطلب اتبعت بشكل صحيح و سليم و ان شاء الله بنسبة 95 % هيتوافق عليه لما يتم مراجعته من ادارة الموقع خلال فترة لا تقل عن اسبوع و لا تزيد عن اسبوعين بالكتير
فى حالة لو الفترة زادت عن 10 - 14 يوم , ابعت للدعم الفني للموقع و استفسر منهم عن السبب
الدعم الفني لموقع فيربلينج من هنا
بعد الموافقة على الطلب ندخل بقى فى تجهيز بروفايلك و المفروض ازاي يكون ظاهر للخارج
3 ||| الخطوة الثالثة :
تجهيز البروفايل ليك بشكل ممتاز
لو اتميت كل الخطوات بنجاح هيكون تجهيز البروفايل من الداخل سهل للغاية ( زي الفيسبوك او اي بروفايل منتدي عربي )
و لو في اي نقطة ابعتلنا فى اي وقت بتعليق على الشرح
المفروض بقى يكون بروفايلك زي كدة :
1 = ده الفيدباك اللى بييجي من الناس اللى درستلها و تقييم كل واحد ليك , لهذا حاول تكون جيد و مفيد ليهم
مش تضيع الساعة و خلاص فى غير فايدة ليهم
2 = هنا وصفك اللى بتكتبه عن نفسك للناس , و هتلاقي فوق الفيديو اللى رفعته عن نفسك
3 = هنا سعر الجلسة التجريبية بتاعك , ( تقدر تحطه زي ما انت عايز , هنا اديك شايف عاصم حاطط 47 جنيه استرليني يعني ما يساوي 107 جنيه مصرى , ما شاء الله عليك يا عاصم يا مشرفنا :D :D )
4 = هنا سعر الجلسة الواحدة ( ساعة ) و سعر حجز 5 جلسات ( 5 ساعات على مدى ايام او اسابيع )
و سعر حجز 10 جلسات , و طبعا فيه تخفيضات كل ما تحجز اكتر مقدما كل ما السعر يقل كتشجيع
5 = هنا زر الحجز اللى بيدوسه اللي عاوز يتعلم منك
6 = هنا لو عاوز يبعتلك مثلا يستفسر عن حاجة قبل الدرس او ممكن يطلب منك تخفيض السعر مثلا او تجربة ساعة تجريبية بسعر مختلف او طلب لفصل اونلاين , الخ الخ
هنا ده جدولك اللى بتحدده لنفسك , جدول حصصك على مدار الاسبوع
الاوقات اللى حضرتك متفرغ فيها بحيث يقدر الزبون يحجز قبلها بيومين للوقت ده
بيدوس الزبون على اليوم و يختار الساعة او الساعتين و يدوس حجز
لو الزبون التلميذ داس اختيار الوقت او الساعات , بتطلعله النافذة دي و يدفع من خلال باي بال او الفيزا الخاصة بيه لعاصم
و بعد كدة بتتفقوا على الشرح من خلال سكايب او هانج اوت ( جوجل ) حسب ما يناسبكم
و تتكلم معاه و تحكي معاه , و تستفسر منه عاوز تتعلم كذا لإيه .. و ايه المطلوب شرحه
و ممكن تكونوا اتكلمتوا مع كدة فى الرسائل ( من هنا بقى ده شغلك انت و شطارتك و قدراتك )
و فى النهاية سحب الفلوس سهل جدا من خلال تحويل سهل على باي بال
و زي ما قلنا هنشوف حكاية البايونير و هنتابعها و نحدث المدونة بالشرح بيها اول ما تنزل ان شاء الله
لو في اي اسئلة , ابعتها لي او اكتبها فى التعليق على المدونة
لا تنس نشر الشرح لأصدقائك و اصحابك اللى حاسس ممكن و قادرين يعملوا حاجة زي كدة
و بالتوفيق يا رب ليكم جميعا
دعواتكم
اخوكم محمد علم
