علشان كل جديد بيقع فى بعض الاخطاء اللى ممكن تضره على اب ورك
لهذا مهم جدا نركز على الوصايا السبعة دي لكل واحد جديد على موقع اب ورك
( و تشمل كذلك باقي المواقع التانية لأنها عامة لكن بركز دايما على اب ورك للأهمية )
1 |||| اول حاجة : تضبيط البروفايل
ضبط بروفايلك من كافة التفاصيل قدر المستطاع
- over view كويس و مختصر و بيعبر عن خبراتك و مهاراتك
- صورة كويس بجودة كويسة بروفيشنال مش صورة موبايل بايظة
- حالل امتحان بدرجة حلوة ( لو مجاني )
- رابط لبورتوفوليو فيه شغلك , فيه على الاقل 15 نموذج من شغلك
( و دي اهم نقطة :
لأن لازم بورتوفوليو انت جديد
لأن .. لو فيه واحد Client هيدخل بروفايلك , هيعرف منين انك شغال و تنفع ؟
حاجة من اتنين
اما انه يشوف زبون سبقه و اشتغل معاك و بيشكر فيك ( فيدباك )
او انه يشوف نماذج من شغلك توريه انت تقدر تعمل اللى هو عاوزه
و لا لأ ؟
لهذا البورتوفوليو .. نماذج الاعمال .. حتمية و كتير , و سلي نفسك و انت بتقدم كل يوم انك تضيف حاجة من شغلك و لو بسيطة بس تكون بتوري مقدرتك ايه و اعلى مستوى عندك
2 |||| تاني حاجة : الكوفر ليتر تكون ذكية و تفاعليةما تعملش رسالة تقديم ثابتة هيا هيا تبعتها لكل الناس
اغلب المبتدئين بيصيغ رسالة ثابتة تنفع تتبعت لأى شغل
على طريقة :
( مساء الخير - حلو الشغل ده - عاوز اقدم عندكم - انا كويس و انفع )
غلط !!! كدة انت بتهبل !
لأنه اي عميل هيعرف على طول بمجرد النظر و لكونك مبتديء ان دي رسالة
سبام و هيا هيا نفس الرسالة بتبعتها لأى شغل
و اكيد ما حدش بيرد على سبام
يبقى لازم تكون رسالة مخصصة ليه .. اتعب شوية
اقعد 5 دقايق عشان تصيغ رسالة محترمة مركزة مختصرة
توضحله فيها انك قريت المشروع ..
يعني مثلا لو انت شوفت مشروع مكتوب فيه :
مطلوب تصميم كارت شخصي
ما تكونش رسالتك
( مساء الخير , انا عندي خبرة بالتصميم , قادر انفذ الشغل فى اتقان و اسرع وقت )
لأن دي رسالة تنفع لأى شغل تاني .. كارت .. بروشور .. بانر
لكن لازم تكون رسالتك متعلقة بموضوع الكارت الشخصي
مثلا
( مساء الخير , لدي خبرة كبيرة بالتصميم و خصوصا مجال الكروت الشخصية
و ده نموذج من شغلي بالكروت الشخصية
و حابب استفسر , حضرتك بتحب استايل ( الكارت ) ايه ؟ )
و كدة بقى و انت و شطارتك
.
ضبط السنارة و طعمها حسب كل سمكة
مش نفس الطعم لكل سمكة !!!
نقطة تانية مهمة :
فى الرسالة , ارمي اي سؤال يجبره انه يرد عليك
دور على حاجة نسي يتكلم عنها و اسئله عليها
مثلا :
هو المشروع كام ساعة فى الاسبوع مطلوبة ؟
طيب هو المدى الزمنى قد ايه ؟
طيب مطلوب كام تصميم بالضبط ؟ واحد و لا اتنين ؟
طيب مطلوب صفحة و لا موقع ؟
اي سؤال بس يكون فعلا ذكي
و يجبره يرد
لأنه لو رد فهيكون فيه تفاعل و فرصة اختيارك بتكتر باجابتك
ده غير انه هيحس انك مهتم بجد و بتسأل .. مش سبام او مبتديء
3 |||| تالت حاجة : البورتوفوليو مهم جداالبورتوفوليو portfolio هو مكان بتعرض فيه شغلك
سواء القسم فى بروفايلك فى الاب ورك او فى مدونة تعملها للغرض ده او موقع ( حسب قدرتك )
لو كاتب تعرض فيه كتاباتك , لو مصمم او مبرمج , تحط فيه نماذج لشغلك , و هكذا
مهم جدا يكون فيه على الاقل 10 - 15 نموذج توضح شغلك و قدراتك
و بالاختصار : توضح انت ( تقدر ) تعمل ايه للعميل
لهذا ركز تكون حاجة تعبر عن تنوع قدراتك , يعني لو بتعرف تعمل برمجة تطبيقات موبايل مثلا
و مش حاطط نموذج منهم فى البورتوفوليو بتاعك , تبقى دي نقطة ناقصة
كل ما تزود , كل ما فرصك بتزيد جدا جدا جدا
لو تقدر توفر ساعة من يومك او كل يومين لتحديث شغلك اول بأول , هيكون فيه تأثير طويل المدي جيد جدا ليك
4 |||| رابع حاجة : احذر الأخطاء اللغوية !
ركز ما يكونش فيه اي اخطاء لغوية فى رسالتك !!
ممكن تعمل اخطاء لغوية و انتوا بتتكلموا بعدين
لكن فى الكوفر ليتر .. لما تغلط .. بتدي انطباع زفت
انك اما متسرع و متسربع او مش محترمه
او انك ركيك و ضعيف خصوصا انك جديد
5 |||| خامس حاجة : نافس فى السعر بس بدون مبالغة !
بما انك لسه جديد نافس فى السعر بس ما تخفضشي اوي
يعني ما تخليش اجر ساعتك عالى اوي , بلاش طمع
خليها عند 3 دولار ما تزودهاش فى بروفايلك
و فى التقديم للشغل ما تقللشي سعرك فى الارض
لكن قلله بحاجة بسيطة
يعني مثلا شغلانة ب 20 دولار
خلي عرضك ب 17 دولار
لكن مش تخليها ب 5 دولار
لأنه هيقول فى باله : اكيد هيديني شغل زفت بالسعر ده !!!
فى اجر الساعة بقى العكس
لازم يكون منخفض
لأنه لو شافك عالي و جديد , هيقول عليك عبيط
لأنك بتساوى نفسك بالقدام .. و معتبر نفسك زيهم
بينما انت جديد اصلا .. يبقى مش ذكى .. و ما حدش بيحب التعامل مع فريلانسير غبي
6 |||| سادس حاجة : ركز على عميلك المستهدف
الشغل كذا نوع
فيه نوع بتحس من كلام صاحبه
( دي شغلانة عاوزة محترفين اوي و مش بيهمني السعر )
و فيه نوع ( دي شغلانة عاوزة حاجة معقولة , احتراف على سعر معقول )
و فيه نوع
( دي شغلانة اي حد مبتديء يعملها بس يا ريت يقبل بالسعر ده )
ركز على النوع الاخير اكتر
حاجات زي ( تصويب حاجة ) او تعديل لحاجة
دور فى الشغل ابو 5 دولار او ابو 10 دولار ( القدام مش بيدورو عليها )
و لو ما لقتيش , دور فى العملا اللى لسه جدد
(القدام مش بيبصوا لأى شغلانة لعميل جديد )
لهذا ركز عليه .. دي ساحتك
7 |||| سابع حاجة : الأمانة مهمة جدا هنا
لما تيجي تعمل شغل اوعد العميل بالأمانة
و اعمله باتقان و تعامل معاه بثقة
يعني ما تقولوش مثلا " مش هبعت الا لو بعت "
تعامل بثقة معاه عشان يبادلك الثقة زيها
و بنسبة كبيرة ( يعني من 1 الى 20 ) بيكون اغلبهم ثقة و محترمين لشغلك و جهدك
و ابعتله كل حاجة حسب ما يطلب
و حتى لو سرقه و جرى ؟ مش مشكلة !
اديك استفدت خبرة و تجربة عملية ما خسرتش حاجة !
أى اسئلة ابعتها على جروب الفيسبوك او الصفحة أو على Ask :)
